تره‌وز یئمه‌یی اونوتمایاق

تره‌وز یئمه‌یی اونوتمایاق

بیر مدت قاباغا قدر سوفره‌لریمیزدن تره اسکیلمزدی. سوفره آچیلاندا بیرنجی اؤزونو گؤرسه‌دن تازا ترهوز (سبزیجات) قیرمیزی تورپ‌یلا دولو اولان سوماقپالان اولاردی و سوفره‌نین اورتاسیندا آچیلمیش گوله بنزردی. ایشتهانی آچان تره‌لر، یئمک هَوَسینی ایکی قات ائلردی. آنجاق ایندی سوفره‌نین بو طراوت سمبولو، داها آز گؤرونور. جوربه‌جور آغ، قیرمیزی سوْسلار، چئشیدلی تورشولار و جوربه‌جور چیپسلر بو طبیعی منظره‌نین یئرین توتوبلار.
ایندی ائله اولوب‌، گنج خانیملارین بیر چوخو تره‌لرین خاصیّتلرین بیلمیرلر و حتی اونلارین بعضی‌سین تانیمیرلار. بونا گؤره پیس اولماز تره‌لرین بعضی‌سی و اونلارین خاصیتلری‌ ایله تانیش اولاق و بو بیلگیلری اؤزوموزدن سونراکی نسله تانیتدیراق.

hou5416

تورپ سرطانا قارشی
تورپون ائنلی و توکلو یارپاقلاری اولار. اوچ جوره قیرمیزی، قارا و آغ تورپوموز وار. تورپون خاصیّتی ایستیدیر و بیر آز کؤپدوروجودور. تورپدا گوگود اولدوغو اوچون آنتی‌میکروپ خاصیتی وئریب. هابئله تورپ یاخشی ایشتها آچاندیر.
اوندا اولان چوخلو میقداردا C ویتامینی آغیز ناخوشلوقلارین درمان ائده‌ر و دیشلرین چورومه‌سی‌نین قاباغین آلار. بو ویتامین تورپین یارپاغیندا داها چوخ اولار و غذا ایله بیرلیکده یئییلسه، دمیرین جذبینه کؤمک ائده‌ر.
آراشدیرمالارا گؤره تورپ سرطانلی سلول‌لاری آرادان آپاریر و شیمی درمانی‌نین ساغالماسینا یاردیم ائدیر. هابئله اونداکی یود، قواتر توتان ناخوشلارا فایدالیدیر و بدنین مادّه مبادله‌سینی و قانین دولانماسین دوزه‌نله‌ییب، اؤد (صفرا) کیسه‌سی و بؤیرک داشینا فایدالیدیر. 10-delicious-100-calorie-snacks-that-will-keep-you-satisfied-05

ریحان؛ آغری که‌سیجی و یوخو گتیره‌ن
ریحان چوخ عطرلیدیر. خوشکیت و تشنوج ضیدی و عصبی باش آغریسی و باش گیجللنمه‌نین درمانی. آغری که‌سیجی مادّه‌لرینه گؤره ایضطیرابدان عمله گلن یوخوسوزلوقلاری درمان ائلر و یاخجی موسکّین ساییلیر.
رئیحان آنالارین سودون چوخالدار و بؤیرک ایلتهابی اوچون فایدالیدیر. بو گؤی قارنی یئللندیرمز و معده‌نین ایسپاسملارین آرادان آپارار.

basilOpal1

شاهی، بؤیرکلرین محرکی
شاهی‌نین طبیعتی ایلیملیدیر. A و C ویتامینلر اونو گوجلو آنتی‌اوکسیدانا چئویریب و بدنین ضررلی رادیکاللارین دفعینه کؤمک ائده‌ر. هابئله قانین قندین آزالدار و گوندن عمله گلن گوبوزولارینی آرادان آپارار.
شاهی قانین یاغ و پیس کولسترولون آزالدار و اونو بوخارلانان یاغلاری آسم، بونشیت و مزمن اؤسکورمه‌یه درماندیر.
بو تره‌ده‌کی مادّه‌لر بؤیرَکلرین فعالیّتین تحریک ائلر و مثانه، بؤیرک و اؤد کیسه‌سی داشلارینی آرادان آپارار و مفصل آغریلاری‌له نقرسه چوخ فایدالیدیر.

co601

جعفری؛ قان دوزلدن و قایدایا سالان
جعفری‌ دولودور ویتامین، معدنی املاح، دمیر کلسیوم و فوسفورلا. آیلیق عادتی تنظیم ائله‌ییب قانی دورولدار و هابئله باغیرساقلاری میکروپدان تمیزله‌یر.
جعفری‌ده دمیرین چوخلوغونا گؤره اونو گونده‌لیک یئمه‌یی قانسیزلارا و ائینه‌مه‌لری ضعیف اولان اوشاقلارا توصیه اولور.
جعفری قارین یئلین آرادان آپارا و قارین آغریسین توختالدار. بو تره قارا جییر، آسم ناخوشلوقلاری و تئز یائسه اولماق علامتلرین آرادان آپارار و اونو چئینه‌مک آغیزین پیس ایین و معده‌نین قیجدیرما قازلارین آرادان آپارار.

3886jafari11

ترخون، دوزون موناسیب جانیشینی
ترخونون توند و بیر آز آجی عطری وار. یئمه‌لی تره‌نین ایچینده نئچه تئل ترخون ایشتهانی آچار و آغیزی عطیرلندیره‌ر.
اونون توند اییی دری‌نین میکروبلارین کونترول ائلر و بدنین پیس ایین آزالدار. ترخونداکی توند ائسانس اونو دوز یئرینه ایشلنمه‌سینه امکان وئریر و اونو غذا ایله بیرلیکده یئمک، قلبی ناخوشلارا و قان باسینجی (قان فیشاری) اولانلارا یا دوزسوز قیدا رئژیملری اولانلارا توصیه اولور. ترخون اعصابی گوجلندیره‌ر و یاغلی یئمکلرین هضمینه کؤمک ائدر و بیر مولاییم آغری‌کسیجیدیر. ترخون یاخجی زهر آلاندیر و دردلری تسکین وئرر و آیلیق عادتی‌نین سورونلارینی دفع ائلر. بو تره بدنین ساوونما (مدافعه) گوجون چوخالدار و ویروسی ناخوشلوقلارین شدّتین آزالدار.

VETAR27219_3

کئشنیش؛ قانین قندین آزالدار
کئشنیشین (گشنیز) طبیعتی سویوقدور و خوشا گلیم ایی یوخدور. چینلی‌لر بو تره‌یه چینلی جعفری دئییرلر. کئشنیش قانین باسینجی ایله قندین آزالدار، اوره‌ک بولانما و سوسوزلوغا فایدالیدیر و یاخجی آغری‌کسیجیدیر. معده، بئیین و اوره‌یی تقویت ائلر. آنتی ایسپاسم، تَرله‌دن و ایشتها گتیرندیر و قارا جییر و دالاغین لاپ یاخشی درمانیدیر.
بو تره‌، طبیعتی ایستی اولان یئمک‌لردن عمله گلن آکنه‌لری آرادان آپارار و جنسی مئیلی مولاییم ائلر. اونون چوخ یئییلمه‌سی یوخونو پریشان و آیلیق عادتین دوزه‌نینی پوزا و اینسانی گیجللندیریب درین یوخویا آپارار.

cilantrocori

حاضرلایان: اکبر سعادت

(بو یازی بیلیم سسی طرفیندن دوزه‌نله‌نیبدیر)

مطالب پیشنهادی :

2 نظر

  1. Hüseyn می‌گه:

    تشککر ائده ریم.

باخیش گؤندر