آنا ديلي، وارليغيميزين آنا گؤستريجيسي

آنا ديلي، وارليغيميزين آنا گؤستريجيسي

سون عصرلرده باشقا دؤنملرله موقاييسه‌ده ديله اولان باخيشدا بؤيوک بير دَييشيم گؤزه چارغير. 19-جو عصره قدر، ديل، فيکير چاتديرماق اوچون بير آراج اولاراق ديرلنديريليردي. 19-جو عصردن اؤنجه ديلين دوشونجه‌ده‌کي رولوندان و دوشونجه‌نين قوروجو عاميللريندن اولدوغو حاقيندا هانسيسا بير گؤروشون اورتادا اولدوغونو گؤرموروک.

زامان کئچديکده ديلين ساده‌جه دانيشيق اوچون ايستيفاده اولونماماسي، بلکه ديلين وسيله اولاراق ايستيفاده اولونماسيندان باشقا ديلين، بير ياراديجي عاميل کيمي اورتايا چيخماسي بير چوخ بيليم آداملاريني دوشوندوردو. حتّي ايش او قدر اؤنملي بير ساحه يه کئچدي کي، فلسفه‌ده بئله،ديل اوزرينه گؤرولن ايشلر اولدوقجا بؤيوک يئر آلدي. سون عصرلرده فلسفه‌ده ديلين اؤنمي و ديل فلسفه‌سي اولدوقجا بؤيوک يئر آلدي.
باخماياراق کي، بير چوخ فيلوسوفلارين نظره آلدیغی ديل آنلاييشي بيزيم يالنيز دانيشديغيميز ديل اولماميش. اونلار هم ده بوتون نيشانه‌لر، گؤسترگه‌لر اوچون اورتايا قويولان بير مساله‌ني ديل کيمي نظره آلميشلار. گؤسترگه و يا نيشانه‌لرين ايسه اَن موکممل فورماسيني بيز ديلده تاپا بيله‌ريک.
ديل، تاريخ بويو ياشانيلانلارين شاهيديدير. اونلاري اؤزونده يانسيدان و اولانلارلارا بللي ائتکي بوراخا بيلن بير عاميلدير. اينسانين داورانيشلاري، اينانجلاري، ائتديکلري ايله بير باشا ايرتيباطدا اولان ديل، دوشونجه‌ميزين ياراديجي عاميللريندندير. بوتون بونلاري ديل- دوشونجه ايرتيباطي ايچينده اَله آلا بيلريک. دوشونجه ايله ديلين نه کيمي بير ايرتيباطي اولماسي حاقيندا سون آراشديرمالار، توپلومدا ديلين رولونا داها دا بؤيوک اؤنم وئرمه‌يميز اوچون ثوبوتدور.حتی بير سيرا گؤروشلره گؤره توپلومدا بللي بير دَييشيکيکلييه ال تاپماق اوچون ديليميزين اوزرينده ده ايشلري آپارماق لازيمدير. چونکي، ديل دَييشديکجه دوشونجه‌ده دَييشمه‌يه دوغرو گئده بيله‌جکدير.Basat_Dil
سؤيله‌ديکلريميزين هاميسي بير باشا اينسانين آنا ديلي ايله باغليدير. چونکي، اينسان آنا ديلينده دوشونر. باشقا ديلده دانيشسا بئله اينسانين دوشونجه‌سينده قوروجو رولو اولان ديل، آنا ديليدير. آنا ديلي، يا اساس ديل، اصلينده اينسانلارا بوتون وارليغي تانيدان بير عاميلدير. آلمان فيلوسوفو هايدئگئر، “ديل، وارليغين ائويدير” سؤزونو سؤيله‌ينده بوتون بونلاري نظره آلير. چونکي، اينسان وارليغي درد ائتمک اوچون هانسي‌سا گؤسترگه‌لري(نيشانه‌لري) تانيماليدير. بئله اولماديغي حالدا هر شئي آنلاشيلماز اولا بيلر. باشقا ايفاده ايله سؤيله‌سک، بيز، آنا ديليميزين پنجره‌سيندن دونيايا باخيريق.

بوتون دونياني يوزماق (تفسير ائتمک) اوچون بيزه شراييط يارادان ديلدير و بو ديل، آنا ديلي اولاندا هر شئيي اولدوغو کيمي گؤروروک. اؤز دونيا گؤروشوموزله باخيريق حاديثه لره. چونکي، هر سؤزجوک هر کلمه‌نين ده آرخاسيندا بيزيم کولتوروموزون، بيزيم تاريخيميزين و دوشونجه‌لريميزين ايزيني گؤرمک اولار.

ديل و کولتور ؛
ديل، ياشامين بوتون ساحه لرينده، گونده‌ليک ياشامين اَن ساده حاديثه لرينده، عنعنه لرده، اينانجلاردا و حتّي دوشونجه مسله‌لرينده اورتايا چيخار. بونونلا ياناشي ديل ده بوتون حاديثه لرله اؤزونو اويغونلاشديرار. بئله‌جه ديلله کولتور هر زامان ديناميک و قارشيليقلي بير تاثيرده اولارلار. ويلهئلم وون هومبولت،”ديل، بير محصول دئييل، بلکه بير تاثيرليليکدير” دئينده قارشیلیقلی تاثیردن دانیشیردی. چونکي، ديل جانلي بير وارليقدير و هر بير ميلتين روح اؤزلليکلريني اؤزونده داشيياراق،او ميلته منسوب اولانلارين دونيا گؤروشنه تاثير بوراخيب و تاثير قبول ائدير.بو اوزدن ديل، هر زامان کولتورون يانسيتيجي طرفيدير.هر بير ميلتين ديلي، او ميلتين کاراکتئريني، دونيا گؤروشونو، کولتورونو اؤزونده داشييير. بونون اوچون ده نه ديلي کولتوردن تام موستقيل گؤرمک اولار، نه ده کولتورو ديلدن. عئيني حالدا هر بير ميلتين اينسانلاري دا ديلين تاثيري آلتيندا قاليرلار.

فرد و ديل ده، کولتور و ديل کيمي قارشيليقلي اولاراق بير- بيرينه تاثير بوراخيرلار. نه فرد ديلدن موستقيل اولاراق “وار” اولا بيلر، نه ده ديل فردلرين تاثيريندن کاناردا قالا بيلر. بوتون بونلاري دوشونجه تاريخينده ايزله‌يه بيلريک. حتّي بير چوخ دوشونرلرين فيکرينه گؤره يونان فلسفه‌سينين اورتايا چيخماسينا يونان ديلي شراييط ياراتميشدير. يعني ديل، دوشونجه‌يه بللي بير تاثير ائتمک اوچون ايمکاني هر زامان اولموشدور.

ديل و ميلت باغليليغي؛
بلکه ده ديل، ميلتين اساس گؤستريجيسيدير سؤزو چوخ تکرارلانديغي اوچون بير چوخوموزا تکرار بير سؤز کيمي گله بيلر. آما گئرچک بودور کي، بللي بير فورمادا ديلي قوران، اينسان توپلوسو ایله اوز- اوزه‌ییک و بو اينسانلاري بير بيرينه باغلايان بير عاميل کيمي ديل اورتادا اولور. بو اينسانلارين کاراکتئرلريني ده اورتايا قويا بيله‌جک بير گؤستريجي کيمي ميلتين ديلي ايله اوزله‌شیریک. ديل، ائله بير وارليقدير کي، اينسانلاري يابانجيلاشديرا دا بيلير، عئینی حالدا بيرلشديره ده بيلير. ميللي فرقليليک ايلک اولاراق ديلده اؤزونو گؤسترير.ميلتلر ديلله بيلينجله‌نيرلر و بونون واسيطه‌سي ايله بيلگيلر قازانیرلار.عئيني حالدا ديلده بيلگيلر، دويغولار يوکله‌ميشلر.بو قارشيليقلي تاثير نتيجه‌سينده “ديلين کاراکتئري، طبيعي بير گئديشده ميلتين روحي خوصوصيتلريندن دايما تاثير آلاراق اورتايا چيخان بير نتيجه‌دير”.

بوتون بو خوصوصيتلرين نتيجه‌سي اولاراق، ديل، ميلتلري فرقلنديرن عاميل کيمي اورتايا چيخميش. اينسانلاري ميلتلره بؤلن ديل عاميلي، عئيني حالدا ميلتلرين تاثيرينده قالار و بوندان باشقا ميلتلرين روحي خوصوصيتلري فرقلي اولدوغوندان ديلين ده قورولوشو فرقلي بير فورمايا گتيريب چيخاريلير. هر ديل، ميلتين خوصوصيتي ايله بللي بير اؤزلليک قازانار و يئنيدن عئيني تاثيري ميلتين اينسانلارينا بوراخار. بوتون میللت‌لرین یاشامی بویو تکرارلانان بو گئدیش، گئت- گئده باغلیلیغی آرتیرار.dil_düyünü

دوروموموز، آنا ديليميز ؛

يوخاريدا ديلين اؤنميندن دانيشديق. ديلين نه کيمي بير وارليق اولدوغو حاقيندا سؤيله‌ديم. ايليکلريميزه قدر ايشله‌ميش بو ديلين، روحون اَن درين قاتيندا يئرلشديیيني گؤز اؤنونه آلديم. داها دوغروسو بوتونلوکله بيزي احاطه ائدن عاميلدن سؤز گئدير، آما بو گئرچکلی‌یين یالنیز بير طرفيدير. باشقا طرفينده ايسه ديليميزين ياساقليغي سؤز قونوسودور. ديل ياساقليغي عئيني حالدا دوشونجه‌ميزين ده ياساقليغيدير. چونکي، ديلسيز دوشونجه‌نين اورتادا اولدوغونو گؤرموروک. آنا ديلينده ائييتيم اولمادان وارليقلارا اؤز گؤزوموزله باخماق محروموق. اينسانين دوشونجه‌سينين اينکيشافي آنا ديلينده دوشوندويونده اولار.

آنا ديلي دئديیيميز، ميلتين دوشونجه‌سينين اساس ديليدير. بو هئچ ده اينسانلارين باشقا ديللري اؤيرنمکلرينه قارشي اولان بير مؤوضوع دئييلدير. عکسينه اينسانلارين گليشمه و ميلتلرين ميلت اولاراق دونيايا باخيشلارينين اؤنونو آلماماقدان سؤز گئدير. هانسيسا بير دوشونر، ديلين دوشونجه‌نين ياراديجي عاميلي اولماسي و آنا دیلده دوشونمه‌ حاقيندا فيکريني خاطيرلاييرام. ” آنا ديلده دوشونمک بير پنجره‌دن دونيايا باخماقديرسا،باشقا بير ديلده دوشونمک ايسته‌یي پنجره‌نين اؤزونو بيزه وئره بيلمز، يالنيز پنجره‌دن بير شکيل گؤزوموزون اؤنونده اولار”.چونکي، ديل اؤز موحيطيند، اؤز اورتاميندا دايم ميلته منسوب اولان اينسانلارلا بيرگه اولماليدير. بئله اولدوغوندا ميلتين، ميلت کيمي گليشمک ايمکاني اولاجاقدير. بونون اوچون ده میللت اولدوغوموزو قوروماق دوشونجه‌سی ایله یولا چیخماق ایسته‌سک دیلیمزی و دوشونجه‌میزی قوروماقدان باشقا یولوموز یوخدور.

یازیچی:آنار آیدین

مطالب پیشنهادی :

باخیش گؤندر